"I Giacometti" en ils kinos

Il film documentar «I Giacometti» attira il public svizzer en rotschas en ils kinos. Cun 36'000 visitadras e visitaders èsi il film documentar Svizzer cun il pli grond success en la rangaziun dal 2023.
 
Il film da Susanna Fanzun è vegnì en ils kinos da la Svizra tudestga ils 19 october 2023. "I Giacometti" vegn era mussà en ils kinos en Germania ed a partir dals 26 da schaner 2024 en l’Austria. A partir dals 6 da mars 2024 vegn el mussà en ils kinos da la Svizra franzosa.
 
Recensiuns dal film as chatta quia.

 

Locarno Film Festival 2023

Il film documentar I Giacometti da Susanna Fanzun è il film d’avertura da la secziun Panorama Suisse: als 3 d’avuost a las 11:00h i’l FEVI.

Il film accumpogna ils commembers da la famiglia d’artists Giacometti durant quasi in tschientaner e mussa lur relaziun cun lur patria Bergiaglia – umenzà tar il bab, il pictur Giovanni Giacometti, sur ils figls, il pictur e sculptur Alberto, il sculptur e designer Diego e l’architect Bruno fin tar la figlia Ottilia ch’era cusunza e designera da textilias. Tegnì ensemen ha la famiglia mamma Annetta.

Il film è vegni product da Dschoint Ventschr en coproducziun cun Pisoc Pictures, Radiotelevisiun Svizra Rumantscha e l’SRF.
 
A partir da la mitad d’october vegn il film lantschà en ils kinos in Svizra.
 
 
"I Giacometti" i'l FEVI a Locarno

 

SAIRADA FILM & CULINARICA

La prossima sairada aint la Fundaziun Nairs es als 24 da gün 2023. Tschaina a las 19h, film a las 20:15.

1976 (2022), da Manuela Martelli

La redschissura Manuela Martelli observa in seis debüt da film la vita our da la perspectiva d’üna duonna, chi deriva d’üna famiglia benestanta e chi s’ha arrandschada suot la dictatura in Chile. Illa chasa da vacanzas al mar s’inaccordscha Carmen d’ün’otra realtà e decida dad agir.

Sco giast special bivgnantaina a duonna Margarita Gaudenz (74). Ella ha vivü passa 50 ons in America Latina e s’ha angaschada là per la democrazia. Davo il film sun quels e quellas chi’d han interess invidadas da discutter cun ella i’l ravuogl davart sias expereinzas.

Daplü infuormaziuns sur dalla sairada as chatta quia.


 

Premiera "A la tschertga da l'avieul nair"

Il film documentar „A la tschertga da l‘avieul nair“ da Casper Nicca ha gnü sia premiera als 22 da gün 2023 a Zernez.

L'introducziun dal film ha fat il directur dad RTR Nicolas Pernet.

Premiera cul regissur Caper Nicca

 

Ün pass important per la promoziun da film in Grischun

La Regenza Grischuna ha approvà il model per la promoziun dal film dal chantun. Il model nouv cumpiglia tuot las fasas dals projects, davent dal svilup dal scenari, pro la producziun, la postproducziun fin pro la distribuziun.
 
Las cineastas e’ls cineasts independents rumantschs sun satisfats da quist svilup. No ingrazchain al producent e cineasts Hercli Bundi chi’d ha elavurà per l’uffici da cultura dal chantun Grischun il concept da basa per la promoziun da film in Grischun. Ingrazchar laina eir a la manadra dal uffici da cultura per seis sustegn persvadent.
 
Quia as chatta la communicaziun da la Regenza dals 22 da gün 2023 cun tuot las infuormaziuns sur dal model nouv da promoziun dal film.
Hercli Bundi: "Eisenberger"

 

sairada film & culinarica

La prossima sairada aint la Fundaziun Nairs es als 25 da marz 2023. Tschaina a las 19h, film a las 20:15.

Salt of this Sea (2008), dad Annemarie Jacir

Soraya, chi’d es creschüda sü a Brooklyn viagia cun 20 ons per la prüma jada in Palästina, la patria da seis perdavans. Là prova ella da retrar ils raps bloccats dal conto dal bazegner e da la nona. Ella viagia cun Emad chi’d es nat in Palestina tras il pajais. Salt of this Sea es ün Roadmovie chi descriva la tschercha da las ragischs persas e da quai chi’s nomna patria.

L’aritsta Duaa Qishta sco giast special:

Duaa Qishta es ün'artista e matematicra our da la stribla dal Gaza. Hoz viva ella a Paris sco fügitiva arcugnuoschüda. Angelo Andina e Susanna Fanzun cuschinan insembel cun Duaa Qishta il trat «Maqlouba» tenor ün rezept da sia sia mamma. Davo la tschaina e'l film discuorrina cun l’artista davart sia vita sco duonna in sia patria ed hoz in Frantscha.

Daplü infuormaziuns sur dalla sairada as chatta quia.

Annemarie Jacir: "Salt of this Sea"

Premiera «Da professiun: Chaun»

Igl film documantar «Da professiun: Chaun. La faszinaziùn da la colavuraziùn da tgàn a carstgàn» da Menga Huonder-Jenny â gieu premiera agl kino Apollo a Cuira ils 19 da favrer 2023. Igl film mussa an moda impressiunànta igl tgàn betga me sco animal da famiglia, mobagn ear sco gidànter digl carstgàn ca â la leztga da spindrar near da gidar a glieud.

Suainter egn peer pleds introductivs a la preschentaziùn digl film e plenavànt vagnieu musso la davosa producziùn da la Menga Huonder-Jenny cugl num «noss exots», ca veva mai gieu egna premiera an consequenza da corona.

 

Patrick Maridor e Menga Huonder-Jenny
Premiera agl kino Apollo a Cuira

Dis da Film a Soletta 2023

Il film "I Giacometti" da Susanna Fanzun es gnü nominà pel PRIX DU PUBLIC.

Daplü infuormaziuns sur dal film quia.

Samir e Susanna Fanzun

Films rumantschs a festivals

Il film "Senza sturnizi - Richard Corey, constructur da punts persas" da Susanna Fanzun es gnü muossà in favrer 2023 al Festival Gorniskega Filma in Slovenia.


Sairadas "film e culinarica"

Nos team dad organisaziun fa üna pitschna pausa d'inviern. Las sairadas illa Fundaziun Nairs continueschan però eir i'l 2023. La prossema sairada da "film & culinarica" varà lö als 25 da marz 2023.

Vers la fin da favrer as chatta il programm nov quia.


Culissas per films en il Grischun spetgan da vegnir inscenadas

Grischunas e Grischuns s’impundan en favur d’in GEA a la lescha da film: In GEA a la lescha da film porta avantatgs a la producziun culturala dal Grischun, al turissem ed a la mastergnanza locala. Era per las activitads creativas sin il sectur da film en il Grischun èsi ina gronda schanza. Culissas adattadas, cuntegns ed istorgias per films na mancan betg. Grazia als daners supplementars dessi dapli innovaziun e diversitad en la producziun cinematografica, tant en il Grischun sco en Svizra.
 

Nossa communicaziun a las medias as chatta quia. Il logo rumantsch quia.


Sairadas "film e culinarica"

Las sairadas cha no organisain aint la Fundaziun Nairs continueschan eir i'l 2022.
 
La prossma sairada ha lö als 28 da mai 2022.
Muossà vegn il film ficziunal "107 Mothers" dal redschissur Péter Kerekes. Il film dal 2021 es gnü premià a Venezia cul Venice Horizons Award per il melder libretto ed a Chicago cul Hugo d'argent per la meldra redschia.
 
Tschaina: 19:00 h
Projecziun dal film: 20:15 h
Per la tschaina esa necessari da reservar la plazza infin venderdi a las 13:00 h:
info@nairs.ch, tel: +41 81 864 98 02.
 
Il cumanzamaint da las sairadas vaina fat quist on als 9 d’avrigl cul film curaschus dal redschissur Samir „Bagdad in my Shadow“. Samir es stat preschaint ed ha cuschinà cun no ün menü irakais. Davo la projecziun dal film ha discus Susanna Fanzun cun el sur da sia lavur vi dal film e las differentas reacziuns pro las projecziuns sün l’inter muond. L’occurenza d'eira vendüd’oura.
 
Fundaziun Nairs

"Tales of a Tree" dad Oliver Conrad

Nos commenter Oliver Conrad ha creà la projecziun da Nadal vi dalla chasa cumünala da San Murezzan:

"Tales of a Tree" es üna projecziun da video e glüm accumpagnada da musica chi quinta ün'istorgia da Nadal.

Daplüssas infuormaziuns as chatta quia.

Südostschweiz, 1 da december 2021

Radunanza generala 2021

La radunanza generala dals cineasts.ch ha gnü lö als 9 dad october 2021 il Bistro dalla staziun a Lavin.

Da schnestra a dretta:

Menga Huonder-Jenny (suprastanza), Daniel von Aarburg, Casper Nicca, Manfred Zazzi, Susanna Fanzun (presidenta), Manuela Steiner (suprastanza), Martin Cantieni.


Fundaziun Nairs – Film & culinarica mussa «Gleschterabend», «Wild — Jäger und Sammler» e «Message in a Bottle»

L'occurrenzas han lieu ils 17 da settember, ils 14 d'october ed ils 13 da november 2021. PDF dal flyer.

Flyer

Cineastas e cineasts en la pressa: Nairas uras da puspè filmar e resun sin la «Metta da fein»



PDF da l'artitgel «Tuots braman da pudair filmar darcheu», La Quotidiana dals 21-5-2021

PDF da l'artitgel Il cussegl dal public è cuntent cun «Metta da fein», La Quotidiana dals 11-5-2021

La seria-web che RTR ha producì l'onn passà vegn mussada a differents festivals da film. La seria è gia nominada per plirs festivals da films en l'exteriur ed ha schizunt pudì gudagnar in u l'auter premi.

La seria ha gia gudagnà differents premis:

  • November 2020: Crown Wood IFF, India, Best Web Series
  • December 2020: Luleå IFF, Svezia, Best Web Series
  • Schaner 2021: 3rd Phoenix Shorts, Ontario, Canada, Best Episodic Competition
  • Schaner 2021: 13th Short to the Point International Film Festival, Bucharest, Rumenia, Best Series
  • Zercladur 2021: 7th Die Seriale, Hessen, Germania, nominà per:
    il meglier script – Carlo Beer & Urs Berlinger
    il meglier actur – René Schnoz
    il meglier actur secundar – David Flepp
  • Prix Italia International Competition for Radio, TV & Web 2021, Milano, Italia, Short List

Tar quests festivals è la seria vegnida mussada:

  • Favrer 2021: 6th Medellin International Film Festival, Medellin, Columbia
  • Favrer 2021: 1st Japan Web Fest, Giapun
  • Avrigl 2021: 30th Cinequest Film & VR Festival, San Jose, USA
  • Matg 2021: 6th Pilot Light TV Festival, Manchester, Gronda Britannia
  • Avrigl 2021: 14th Philadelphia Independent Film Festival, Philadelphia, USA
  • Zercladur 2021: 2nd Santa Monica Webfest, Los Angeles, USA
  • Fanadur 2021: Open Air Kino, Val Lumnezia

L'entira seria-web pudais Vus guardar ussa sin Play Suisse cun suttitels tudestgs, talians e franzos e sin rtr.ch/play.

Artitgel en la Quotidiana dals 21-5-2021
Artitgel en la Quotidiana dals 11-5-2021

Ferm signal per la cultura

Trais milliuns daplü per la cultura. Üna majorità da las deputadas e dals deputats han sustgnü aint la sessiun d’october 2020 aint la debatta per la ledscha da la promoziun da cultura la proposta dad augmaintar il büdschè per 3 milliuns francs l’on. Quai per ils prossem 4 ons. L’augmaint e la continuità sun ün ferm sen per la cultura in Grischun ed ha eir ün effet positiv per la lavur da film.

IIs cineasts e las cineasts s’allegran da quist resultat ed ingrazchan a las deputadas ed als deputats dal Grischun chi’d han sustgnü la proposta cun ferms votums e cun lur vusch. Ün grazcha fich per seis angaschamaint al regent dal uffici da cultura a Jon Domenic Parolini ed a la gruppa da lavur chi’d ha fat excellenta lavur. Quai sun impustüt la manadra dal uffici da cultura Barbara Gabrielli, il collavuratur scientific Armon Fontana, il president da la cumischiun Andreas Leisinger, Nikolaus Schmid president da l’Associaziun CHANTUN DA CULTURA GRISCHUN ed a tuot las persunas da cultura chi’d han collavurà e contribui a quist resultat.

Susanna Fanzun, presidenta cineasts.ch

PDF da l'artichel «Fundamentale Erhöhung des Kulturbudgets ist greifbar nahe», SO dals 21-10-2020

Uschè esa gnü vuschà per (verd) e cunter (cotschen) l’augmaint da 3 milliuns.
Per congualar
Ün artichel da la gazetta Südostschweiz dals 21-10-2020

Fundaziun Nairs – Film & culinarica mussa «Parasite»

L'occurrenza ha lieu ils 17 d'october 2020. PDF dal flyer.

Flyer

Revista: Films rumantschs i’l focus als «Dis da film» a Zuoz

L’uniun cineasts.ch ha organisà als 4 ed als 13 d’avuost il pitschen festival da film „Dis da film“ i’l Hotel Castell a Zuoz. Il festival es stat ün ommagi al film rumantsch ed ün regal a la Lia Rumantscha chid ha festagià seis giubileum da 100 ons. Als 4 d’avuost sun gnüts muossats films dürant tuot il di fin aint per la not ed als 13 avuost a partir da la saira a las 18:00h. Festival in duos parts. La prüma part dal festival als 4.d’avuost as ha dedichà a l’emigraziun. Üna tscherna da films documentars, d’animaziuns ed ün film giovà as dedichan al „Ir e tuornar“. La seguonda part es statta suot l’insaina „Special litteratura“ e muossa purtrets d’auturas e d’auturs da l’Enigadina e da la Surselva. Il program varià as chatta sün cineasts.ch. D’inrar haja dat l’occasiun da verer üna paletta da films rumantschs uschè variada. Ün public cinefil es gnü illa sala dal kino dal Hotel Castell a verer ils films chi sun gnüts realisats in differents idioms cun suottitels tudais-chs. Tanter ils films han bivgnaintà las cineastas Susanna Fanzun, Ella Steiner, Susanna Fanzun e Menga Huonder-Jenny giasts specials per discuors. Quai deiran redschissurs, redschissuras e persunas chi’d han dachefar cun l’ün o l’oter film. Ils „Dis da film“ sun gnüts realisats cul sustegn da l’Associaziun svizra reschia e scenari da film, da la Lia Rumantscha, da Radiotelevisiun Svizra Rumantscha, dal Kino Tschlin e d’otras instituziuns.

Dis da film a Zuoz
La cineasta Manuela Steiner bivgnainta il public
Il president da la regenza Grischuna Jon Domenic Parolini, il redschissur Kurt Reinhard ed il president da la Lia Rumantscha Johannes Flury
Il cineast Oliver Conrad chi viva e lavura a Paris
Il redschissur da cult da Puntraschigna Christian Schocher in discuors cun Susanna Fanzun

Films rumantschs i’l focus als «Dis da film» a Zuoz

L’uniun cineasts.ch organisescha als 4 ed als 13 d’avuost il pitschen festival da film „Dis da films“ i’l Hotel Castell a Zuoz. Il festival es ün ommagi al film rumantsch ed ün regal a la Lia Rumantscha chi festagescha seis giubileum da 100 ons. Als 4 d’avuost vegnan muossats films a partir da las 09:00 fin aint per la not ed als 13 avuost a partir da la saira a las 18:00h. Il program detaglià as chatta quia, sün 100onns.ch o sün fögls volants.

D’inrar daja l’occasiun da verer üna paletta da films rumantschs uschè variada. Illa sala dal kino dal Hotel Castell vegnan muossats ils films chi sun gnüts realisats in differents idioms cun suottitels tudais-chs. Tanter ils films bivgnaintan las cineastas Susanna Fanzun, Manuela Steiner e Menga Huonder-Jenny giasts specials per discuors. Quai sun redschissurs, redschissuras e persunas chi’d han dachefar cun l’ün o l’oter film. Ils discuors vegnan fats per rumantsch o per tudais-ch e las moderaziuns in duos linguas.

Festival in duos parts

La prüma part dal festival als 4.d’avuost as dedicha a l’emigraziun. Üna tscherna da films documentars, d’animaziuns ed ün film giovà as dedichan al „Ir e tuornar“. La seguonda part stà suot l’insaina „Special litteratura“ e muossa purtrets d’auturas e d’auturs da l’Enigadina e da la Surselva. Ils „Dis da film“ vegnan realisats cul sustegn da l’Associaziun svizra reschia e scenari da film, da la Lia Rumantscha, dal Kino Tschlin, da Radiotelevisiun Svizra Rumantscha e d’otras instituziuns. L’entrada es libra.

Dis da film a Zuoz

Radunanza generala da l'ARF/FDS

Ina delegiaziun grischuna è stada preschenta a la radunanza da l'ARF/FDS, l’associaziun Svizra da reschia e scenari da film. Il reschissur Ivo Zen è vegnì elegì sco commember nov da la suprastanza da l'ARF/FDS. Ils Cineasts al gratuleschan e giavischan tut il bun!

Ivo Zen, reschissur, Susanna Fanzun, presidenta CIR, Hercli Bundi, producent Mira film e reschissur Daniel von Aarburg

Manifestaziun cunter «No Billag»

L‘iniziativa «No Billag» attatga directamain il service public e cun quai era la lavur culturala en Svizra. Il chantun Grischun cun sia ritga lavur culturala fiss spezialmain pertutgà da l‘iniziativa. Ils 3 da favrer 2018 da las 10:00 enfin las 17:00 ha lieu a Cuira ina MANIFESTAZIUN «Na a No Billag» cunter quest project destructiv. Artistas ed artists da tut las spartas s‘uneschan per protestar cun producziuns culturalas cunter l‘iniziativa.

L‘occurrenza è vegnida lantschada da cineasts.ch (gruppa d‘interess dals cineasts rumantschs). Gist per la Rumantschia, ma era per ils italofons en il Grischun è ina cuntrada mediala che s‘orientescha unicamain al profit in privel existenzial. L‘occurrenza unescha sapientivamain artists da differentas linguas e spartas. Perquai che l‘engaschi per in bun service public n‘è betg mo en l‘interess da las minoritads. El concerna nus tuts.

Il vast sustegn da l‘occurrenza è era pussaivel grazia a la stretga collavuraziun cun la federaziun tetgala novfundada CHANTUN DA CULTURA GRISCHUN / KULTURKANTON GRAUBÜNDEN da la quala ils cineasts.ch fan part. La federaziun tetgala sustegna per exempel las lavurs da programmaziun da l‘occurrenza. La festa vegn ultra da quai sustegnida da tut las regiuns linguisticas dal Grischun (Pro Grigioni Italiano, Walservereinigung, Lia Rumantscha) e perfin dad artists dad ordaifer il chantun. Era la regenza grischuna è s‘exprimida unanimamain e publicamain encunter l‘iniziativa. Cun Andy Kollegger che ha blers contacts ed è da chasa en la cultura grischuna è vegnida chattada la persuna adattada per la coordinaziun da l‘occurrenza. Artists che faschessan participassan gugent a l‘occurrenza cunter l‘iniziativa pon s‘annunziar directamain tar Andy Kollegger.

Persunas da contact:

Susanna Fanzun, inizianta, presidenta cineasts.ch 079 743 77 64

Andy Kollegger, organisatur MANIFESTAZIUN 079 408 15 55

Nikolaus Schmid, president Kulturkanton Graubünden 079 349 07 59

Manifestaziun!

Ulteriuras infurmaziuns ed in livestream da l'entira occurrenza datti sin www.kulturkanton.net!

 

Per finanziar la manifestaziun essan nus dependents da contribuziuns finanzialas. Grazia fitg per sustegnair nossa campagna! Era pitschnas contribuziuns ans gidan da pudair finanziar noss project.

Conto:

Susanna Fanzun, presidenta CIR
Via da Pedra Grossa 430 d
7550 Scuol

PostFinance: 85-788192-9
IBAN: CH48 0900 0000 8578 8192 9
BIC: POFICHBEXXX
Il numer da clearing: 9000

 

 

Communablamain cunter l'iniziativa «No Billag»: Andy Kollegger (organisaziun), Nikolaus Schmid (president Kulturkanton Graubünden) e Susanna Fanzun (presidenta cineasts.ch)

Ils cineasts dischan NA a l'iniziativa NO Billag

L‘iniziativa «No Billag» attatga directamain il service public e cun quai era la lavur culturala en Svizra. Il chantun Grischun cun sia ritga lavur culturala fiss spezialmain pertutgà da l‘iniziativa. Ils 3 da favrer 2018 da las 10:00 enfin las 17:00 ha lieu a Cuira ina MANIFESTAZIUN «Na a No Billag» cunter quest project destructiv. Artistas ed artists da tut las spartas s‘uneschan per protestar cun producziuns culturalas cunter l‘iniziativa.

L‘occurrenza è vegnida lantschada da cineasts.ch (gruppa d‘interess dals cineasts rumantschs). Gist per la Rumantschia, ma era per ils italofons en il Grischun è ina cuntrada mediala che s‘orientescha unicamain al profit in privel existenzial. L‘occurrenza unescha sapientivamain artists da differentas linguas e spartas. Perquai che l‘engaschi per in bun service public n‘è betg mo en l‘interess da las minoritads. El concerna nus tuts.

Il vast sustegn da l‘occurrenza è era pussaivel grazia a la stretga collavuraziun cun la federaziun tetgala novfundada CHANTUN DA CULTURA GRISCHUN / KULTURKANTON GRAUBÜNDEN da la quala ils cineasts.ch fan part. La federaziun tetgala sustegna per exempel las lavurs da programmaziun da l‘occurrenza. La festa vegn ultra da quai sustegnida da tut las regiuns linguisticas dal Grischun (Pro Grigioni Italiano, Walservereinigung, Lia Rumantscha) e perfin dad artists dad ordaifer il chantun. Era la regenza grischuna è s‘exprimida unanimamain e publicamain encunter l‘iniziativa. Cun Andy Kollegger che ha blers contacts ed è da chasa en la cultura grischuna è vegnida chattada la persuna adattada per la coordinaziun da l‘occurrenza. Artists che faschessan participassan gugent a l‘occurrenza cunter l‘iniziativa pon s‘annunziar directamain tar Andy Kollegger.


Cineasts Independents Rumantschs cun nova presidenta

La fin da matg 2017 ha gì lieu la radunanza generala da la gruppa «Cineasts Independents Rumantschs, CIR». Suenter set onns ha Ivo Zen surdà il presidi a Susanna Fanzun. Manuela Steiner è vegnida elegida sco nova secretaria e Menga Huonder-Jenny è vegnida confermada sco cassiera.


La gruppa «Cineasts Independents Rumantschs, CIR» è vegnida fundada l’onn 2008, cun la finamira da rinforzar il film rumantsch sur il cunfin linguistic ora e da promover cundiziuns da basa persistentas per producziuns da film e televisiun independentas rumantschas. En il decurs dals onns è il dumber d’auturas e cineasts activs creschì cuntinuadamain. Actualmain ha l’uniun radund 20 commembras e commembers. Ils ultims onns èn las pli differentas ovras da commembras e commembers vegnidas mussadas a la televisiun ed en il kino e premiadas a festivals da film internaziunals.

Per in ferm service public medial

A chaschun da sia ultima radunanza generala sco president ha Ivo Zen guardà enavos sin las pli impurtantas activitads dals ultims onns. In grond success per ils cineasts e las cineastas è stada l’introducziun da la concurrenza per il svilup d’ovras audiovisualas l’onn 2010. Quella concurrenza ha organisà l’Uffizi da cultura dal Grischun, ensemen cun l’Uffizi federal da cultura, secziun film (UFC), durant trais onns. En consequenza da la restructuraziun en la secziun film da l’UFC è questa promoziun deplorablamain ida a perder. Il 2014 ha la gruppa reagì sin la campagna da reclama cunter la nova lescha da radio e televisiun. La discussiun è savens vegnida manada cun infurmaziuns incorrectas. Ils «CIR» han respundì immediat cun ina replica creativa. En in clip d’animaziun, colurus ed allegher, han els fatg attent sin las valurs da la SRG SSR. Ils emetturs da la SRG SSR represchentan per ils «CIR», il federalissem e la multifariadad culturala da la Svizra. Il clip è vegnì derasà da l’Associaziun svizra reschia e scenari da film (ARF/FDS) en tut las regiuns linguisticas. A la pitschna gruppa da la Svizra rumantscha ha el purtà blera simpatia en la branscha da film svizra. L’avegnir da la SRG SSR n’è però era en il futur tuttavia betg garantida. Il president partent accentuescha, ch’ils «CIR» vegnan era a s’engaschar tar l’actuala iniziativa «No Billag» per il mantegniment d’in ferm service public medial. Betg mo il film rumantsch, mabain era la litteratura, il teater, la musica e l’art profiteschan dal barat cun Radiotelevisiun Svizra Rumantscha. Tut quels che vulessan vinavant medias naziunalas independentas, duessan s’engaschar per la SRG SSR, per il barat tranter las regiuns linguisticas ed il rinforzament da las minoritads!


Puspè in film rumantsch en il kino!

Il di dal kino, ils 4 da settember, mussa Casper Nicca ses film «Lisa va - l'istorgia digl davos pur da Casti» en il kino Rätia a Tusaun.

Igl autur da films Casper Nicca â creo egn purtret intim sur da la cultura purila ca svanescha an egna pintga vischnànca muntagnarda. Casti e egna vischnànceta grischùna. Egna vischnànca da purs davenda l'antschearta davent. Mo ussa e Dumeni, igl davos pur da Casti passa 80 ons vigl. Igl seas muvelet amplanescha ànc las veias da Casti cun freads a tùns d'avant ons. Mo Igl Dumeni tgala da far igl pur. La davosa vatga, la Lisa, va. 'Lisa va'. Casti e nigna vischnànca da purs ple. Igls abitànts da Casti vivan ànc adigna an egn pintg mund, mo igl e ampoet egn oter mund. Igl film mussa egn fearm protagonist, igl davos pur, an egn mund alpin prest amblido. 'Lisa va' e egn film documentar fetg persunal, raquinto digl autur ca viva sez an quella pintga cuminanza.

Igl trailer digl film tgattas vus qua: http://www.imagineria.ch/#trailer

 

‘Lisa va’ - l'istorgia digl davos pur da Casti

Radunanza generala dal CIR

La radunanza generala dal CIR ha lieu

ils 25 d'avrigl 2016 a las 13:00 a Turitg

en l'atelier dad Ivo Zen, en la Töpferstrasse 28. Ina tractanda impurtanta vegn ad esser nossa posiziun «sindicala» envers RTR.
Vegni tuts!


In film rumantsch en il kino!

Il film «Kühe, Käse und 3 Kinder - Jon, Marchet e Braida ad alp» è actualmain da vesair en ils kinos. Il film documentar da Susanna Fanzun che mussa ina stad ad alp ord la vista da trais uffants è ina singularitad: in film per gronda part rumantsch en il kino.
Qua ina survista dals kinos ed openairs che mussan il film e qua ulteriuras infurmaziuns davart il film.

In film rumantsch en ils kinos

GIE, SCHI, HAI, EA e GEA!

Per il nair d'in'ungla ha la populaziun Svizra acceptà la revisiun da la lescha da radio e televisiun ils 14-06-2015: cun 50,08%! Legraivel è che las regiuns rumantschas han acceptà la lescha. Grazia per Voss sustegn!

Ils rumantschs han acceptà la LRTV ils 14-06-2015

Per amur da la diversitad: GIE, SCHI, HAI, EA e GEA a la midada da la lescha da radio e televisiun!

Ch'i dat insumma radio e televisiun en lingua rumantscha, quai pudain nus engraziar a la SRG SSR. Economicamain rentabla n'è ina purschida per ina lingua minoritara sco il rumantsch numnadamain insumma betg. Mo la clav da repartiziun solidarica entaifer la SRG SSR pussibilitescha in program adequat per rumantsch e promova uschia la diversitad linguistica en Svizra. Quai è enconuschent e tuttina da muntada enorma - spezialmain per noss chantun triling.

Ma era per il kino indigen ed ils films independents è la SRG SSR da gronda impurtanza. Cun divers instruments da promoziun (Pacte de l'audiovisuel, Succès passage antenne) sustegna ella mintga onn numerus films independents – era en lingua rumantscha. Per exempel il film «Jon, Marchet e Braida ad alp» da Susanna Fanzun cun il titel tudestg «Kühe, Käse und 3 Kinder» che vegn proximamain en il kino. Uschia pon films far punts tranter las regiuns linguisticas en Svizra. Era questa funcziun da la SRG SSR munta ina contribuziun preziusa a la diversitad culturala!

Ils 14 da zercladur avain nus la pussaivladad da segirar la finanziaziun da la SRG SSR a lunga vista cun in sistem effizient e gist. Per amur da la diversitad!

Noss sustegn da la lescha mussain nus en nossa moda e maniera: cun il filmin sutvart.

 


Rapport annual 2014

La fin da schaner èn ils commembers da la gruppa «Cineasts independents rumantschs CIR» s'inscuntrads a Cuira a chaschun da la radunanza generala. Igl è allegraivel che la producziun da films dad auturas ed auturs independents en lingua rumantscha è gia pulit constanta e da fitg buna qualitad. Dà en egl spezialmain è l'onn 2015 l'ovra da Susanna Fanzun «Jon, Marchet e Braida – Kühe, Käse und drei Kinder». La premiera dal film da 90 minutas ha gì lieu als Dis da film da Solothurn en il Landhaus bel plain.
Deplorablamain restan preschentaziuns da films rumantschs en il kino eveniments extraordinaris. La dumonda co promover la producziun dad ovras che surpassan il format da 25 minutas da l'emissiun da televisiun Cuntrasts han ils CIR era discuttà a la radunanza da quest onn. Era pretendan ils CIR vinavant in engaschi communabel da la secziun da film da l'Uffizi da cultura federal e l'Uffizi da cultura chantunal en favur dal film rumantsch. Ma ils CIR vesan era las difficultads d'in agid da finanziaziun simpel ed efficazi che satisfa a las circumstanzas producziunalas spezialas da la Rumantschia. En il proxim avegnir vulain nus era far attent cun ina festa dal film rumantsch a las ideas ch'ans stattan a cor.

La radunanza generala 2015 ord vista dal president

Radunanza generala a Cuira, ils 24-8-2013

Suenter la festa da 50 onns televisiun rumantscha èn ils commembers da l'uniun „Cineasts Independents Rumantschs (CIR)“ sa radunads a Cuira. Ina ulteriura giada era il tema central la concurrenza per il svilup dad ovras audio-visualas rumantschas che l'uffizi da cultura chantunal e federal avevan lantschà communablamain. L'onn passà han els vulì satrar il project en tut silenzi. Ils commembers dal CIR han exprimì ina ulteriura giada il ferm giavisch da manar enavant la concurrenza ed han incumbensà il president Ivo Zen da contractar vinavant cun l'Uffizi federal da cultura cun la finamira da reanimar il project.


Radunanza generala

Durant il Festival da film da Soloturn il schaner 2012 ha gì lieu gia la tschintgavla radunanza generala da l'uniun „Cineasts Independents Rumantschs (CIR)“. Indesch commembers da l'uniun han chattà la via a la Aare per discuttar las pussaivladads da realisar films rumantschs era independentamain dal format da televisiun „Cuntrasts“. Per quest intent ha la promoziun da cultura chantunala e l'Uffizi da cultura federal, secziun da film, lantschà l'onn 2009 la concurrenza annuala per il svilup dad ovras audio-visualas rumantschas. Suenter ina fasa da pilot da trais onns ha il CIR stuì s'engaschar fermamain l'atun passà per che quest instrument da finanziaziun vegnia mantegnì.

En quest mument (fin da schaner 2012) para la cuntinuaziun garantida. In tema central da la radunanza annuala dal CIR era la concepziun da la nova concurrenza.

Ils cineasts independents rumantschs s'engaschan per che la concurrenza sustegnia en futur era la producziun da films en lingua rumantscha (betg mo il svilup da concepts). L'uniun ha en mira in model che sustegna alternant in onn il svilup ed il proxim onn la producziun da films rumantschs. La finamira da la gruppa d'interess è da pudair producir uschia mintga dus onns in film da pli gronda irradiaziun che pudess vegnir preschentà en il rom dad ina festa a la Rumantschia. Quest film duai silsuenter era vegnir mussà en las autras regiuns linguisticas svizras.


Radunanza generala ils 20 da schaner a Soloturn

La radunanza generala dals Cineasts Independents Rumantschs ha lieu venderdi, ils 20 da schaner 2012 las 14:00 en la Pizzeria da Renato (Unterer Winkel 1) a Soloturn.

La charta da Google gida.


Films rumantschs a Soloturn

Susanna Fanzun, Christian Schocher ed Ivo Zen, commembers dal CIR, èn represchentads cun lur films al festival a Soloturn.

Datas da projecziun :
Glindesdi, ils 23 da schaner 2012

09:30 Kino Palace:
Guarda – Oz sun jau qua da chasa da Susanna Fanzun
    
20:30 Kino Canva Blue:
Films d’amaturs – Amaturs da films dad Ivo Zen
Egliadas – Augenblicke da Christian Schocher

«Films d'amatur - amaturs da film» - in dals trais films a Soloturn, ils 23-01-2012

Premis da la concurrenza per ovras audio-visualas rumantschas 2011

Quest onn èn vegnids sustegnids ils trais projects suandants: Flurina Badel, L'ultim paradis - Carin Camathias, Ernst dall'aua, Martin Cantieni, Rabius a Priština


Ils cineasts rumantschs sin buna via

La radunanza generala 2011 da la gruppa d’interess «Cineasts independents rumantschs, CIR» ha gì lieu ils 26 da favrer ad Ardez. I fa plaschair da constatar ch'il dumber da commembras e commembers s'augmenta constantamain dapi la fundaziun da l’uniun avant 4 onns. Oz reunescha il CIR gia 16 auturas ed auturs da films rumantschs.
In dals puncts centrals ch'è vegnì discutà durant la radunanza è la cuntinuaziun areguard la restructuraziun da la concurrenza per sviluppar ovras audio-visualas rumantschas. Emprimas discussiuns dal CIR cun la promoziun da la cultura dal Grischun han gia gì lieu. La promoziun da la cultura sustegna l’idea dal CIR da stgaffir ina concurrenza en duas etappas a partir da l’onn 2012. Quai cumpigliass era in augment considerabel dals meds disponibels e permettess da sustegnair era la producziun da films. La finamira è dad avair almain mintga dus onns in film rumantsch da pli gronda irradiaziun che po vegnir mussà en kinos ed a festivals.

Hercli Bundi ed Ivo Zen al festival "Impuls" a Vienna, fanadur 2011